ILOILO CITY – Handa na ang mga atleta sa nagkalain-lain nga unibersidad nga magapakigbahin sa 24th University Games sa syudad sang Iloilo.
Sa interview sang Bombo Radyo kay Joshua Bruce, football player sang National University, iya ginpahayag nga duha tubtob tatlo ka bulan nila nga ginpreparahan ang University Games sa diin 41 ka mga unibersidad kag kolehiyo ang magapa indis-indis.
Suno sa iya, ginplanohan sang ila nga team ang mga estratehiya nga kinahanglan agud nga mangibabaw sa tanan nga sporting event.
Dugang pa sang natungdan, kinahanglan lamang nga balansehon ang pag-tuon kag sports agud nga indi ini mangin problema.
Samtang, disiplina naman ang may yara sa mga delegado sang University of the East .
Sa interview sang Bombo Radyo kay James Darrel Orduña, long distance runner-10 km, iya ginpahayag nga magluwas sa University Games nga iya paga-intrahan, kabahin man siya sang Philippine Team sa Southeast Asian Games sa amo man nga sports.
Suno kay Orduña, sa tion sang training wala gid siya nagakalipat nga magpangamuyo.
Inspirasyon niya ang iya pamilya kag mga abyan nga padayon ang pagpati sa iya nga ikasarang.
