CALINOG, ILOILO – Kombinasyon sang kasadya kag kasubo ang kabuhi sang mga Indigenous People.
Sa interview sang Bombo Radyo kay Felicitas Catedrilla, chieftain sang Ati Community sa Brgy. Ipil, Calinog, Iloilo, iya ginpahayag nga indi malikawan nga may yara sang diskriminasyon sa ila nga mga Ati.
Suno kay Catedrilla, bilang isa ka Ati, simple lamang ang ila nga pagpangabuhi sa uma apang sa pihak sang kapigaduhon, nagatinguha sila nga mag-uswag ang ila pagpangabuhi.
Ginpahayag ni Catedrilla nga bilang chieftain sang ila tribu, sa iya nakasandig ang puturo sang iban pa nga mga ati sa ila lugar.
Kabakas kag pagkapisan suno sa natungdan ang iya kapital sa pagpangayo sang bulig sa gobyerno agud nga mahatagan man sang igtalupangod ang Indigenous People.
Isa sa mga ginapabugal sang Ati Community suno kay Catedrilla amo ang ila kaugalingon nga kultura kag ang pagpakita sang pagtahod sa isig ka tawo.
Sa pihak sang kabudlay sa pagpangabuhi, ginpahayag ni Catedrilla nga sa pagbuligay nila sang iya bana nga naghalin sa tribu nga Panay Bukidnon, ila napatapos sa pagtuon ang ila tatlo ka anak nga lunsay naman nagatrabaho.
Nagalaum si Catedrilla nga madula na ang diskriminasyon batok sa Indigenous People nga ginakabig nga manggad sang Pilipinas.
