ILOILO CITY – Plano sang Department of Science and Technology nga magpahamtang sang coastal radars kag synoptic station sa Iloilo.
Ini ang kasunod sang Regional Science and Technology Week nga ginpatigayon sa syudad sang Iloilo sa diin mismo si Department of Science and Technology Sec. Fortunato Dela Peña ang nangin dinapit nga bisita.
Sa interview sang Bombo Radyo kay Dela Peña, iya ginpahayag nga ang Regional Science and Technology Week ang ginapatigayon sa tanan nga rehiyon sa pungsod bangud nga indi tanan ang makapadulong sa Metro Manila agud nga magtambong sa Science and Technology Week.
Suno kay Dela Peña, kadungan sang nasambit nga kahiwatan nga ginpatigayon sa Iloilo Convention Center, may yara sang exhibit nga nagapakita sang panibag-o nga development sa patag sang science and technology.
Ginpahayag ni Dela Peña nga magluwas sa exhibit, may yara man sang seminar nga ginpatigayon tuhoy sa sustainable development sa bulig sang nanari-sari nga ahensya sang gobyerno kag mga non-government organization.
Agud nga mapasangkad pa gid ang serbisyo sang Philippine Atmospheric, Geophysical and Astronomical Services Administration sa Western Visayas, ginpahayag sang natungdan nga may yara sang modernisasyon sa nasambit nga ahensya.
Lakip sa mga plano sang Department of Science and Technology amo ang pagpatukod sang coastal radars kag synoptic station sa Northern Iloilo.
