BUENAVISTA, GUIMARAS – Akig kag emosyonal ang babaye nga nagreklamo tuhoy sa ginapahayag malpractice sang isa ka doktor sa Buenavista Emergency Hospital sa Buenavista, Guimaras.
Sa interview sang Bombo Radyo kay Penelope Fernandez, tagreklamo, iya ginpahayag nga Oktubre 17 sang naaksidente sa motorsiklo ang iya utod kag iya hinablos nga apat ka tuig ang edad.
Gilayon nga gindala sa nasambit nga ospital ang duha nga nakaangkon sang pilas.
Apang gin-dressingan lamang sang doktor ang ila mga pilas kag ginpapauli ang mga ini.
Ginkwestyon ni Fernandez kun ngaa ginpapauli ang iya utod kag hinablos apisar nga madalom ang pilas sang iya nga utod kag naga tinulo pa ang dugo samtang makaduha naman ka beses nga nagasuka ang bata.
Bangud sini, nagpadulong sa ospital si Fernandez dala niya ang utod kag hinablos agud kuntani nga ipatahi ang pilas sang iya utod kag mag-request sang city scan apang wala ini matigayon.
Nagakabalaka si Fernandez sa kahimtangan sang iya utod kag hinablos sa diin iya na desisyonan nga magpadulong na lamang sa syudad sang Iloilo agud nga malantaw ang sitwasyon sang duha.
Sa ila pag abot sa Western Visayas Medical Center, ginkakibot sang doktor kun ngaa wala pa gintahi ang pilas sang iya utod nga tuman kadalom.
Nagapati ang tagreklamo nga may malpractice sa Buenavista Emergency Hospital bangud mismo ang doktor sa Western Visayas Medical Center ang nakibot man nga wala gintahi ang pilas sang iya utod.
Apang indi lamang ini una nga kahigayunan nga natabo sa ila pamilya bangud mismo siya, na eksperyensyahan niya ang serbisyo sang Buenavista Emergency Hospital.
Ini bangud nga sang nakaligad nga tuig, nag spotting siya kag nagpadulong ini sa nasambit nga ospital agud nga mag pa check up.
Didto kag ginpaidalom siya sa Pregnancy Test kag nag positive ini.
Apang may isa ka doktor ang nag abiso sa iya nga mag inom sang bulong nga wala na niya ginhingadlan pa sa diin nagakadapat nga dungan sini imnon ang apat ka mga bulong.
Bangud nga may ihibalo ang doktor suno sa iya, iya ini nga gintuman.
Apang ginkakibot ni Fernandez nga nagpuswak ang madamo nga dugo halin sa iya kinatawo kag nabal-an na lamang niya nga nahulugan na siya sang bata sang nagbalik siya sa ospital kag may isa ka doktor sa Buenavista Emergency Hospital ang naghambal sa iya nga indi dapat ang bulong nga ginhatag sang na una nga doktor ang gin-painom sa iya kag kuntani gin ultrasound anay ang tagreklamo.
Dugang pa sang natungdan, wala gid nagapakita sang pagpalangga kag pag-ulikid ang pipila nga mga doktor sa nasambit nga ospital.
