ILOILO – 77 na ang patay bangud sa Dengue Hemorrhagic Fever sa probinsya sang Iloilo subong nga 2019.
Sa interview sang Bombo Radyo kay Dr. Patrica Grace Trabado, pinuno sang Provincial Health Office, iya ginpahayag nga humalin sang Enero 1 tubtub Oktubre 12 subong nga tuig, naglab-ot na sa 21,050 ang kaso sang Dengue nga mas mataas sa 2,316 nga na record sang 2018.
Suno kay Trabado, ang banwa sang Pototan ang nagpanguna sa listahan kun Dengue casualty ang pagahambalan nga may yara sang 12.
Ginpahayag ni Trabado nga ang banwa sang Cabatuan kag Lambunao ang may yara sang 5 ka patay samtang ang banwa sang Maasin kag Sara ang may yara sang 4.
Ang Sta. Barbara, Carles, San Dionisio kag Zarraga ang may yara sang 3 samtang may duha naman ang Dumangas, Calinog, Ajuy, Alimodian, Pavia, Banate, Estancia, Dueñas kag Bingawan.
Subong nga quarter suno kay Trabado, nagnubo ang numero sang kaso sang Dengue kag wala na nadugangan pa ang casualty apang kinahanglan suno sa natungdan nga padayunon ang pagpaninlo sa palibot agud nga wala sang istaran ang lamok nga nagadala sang balati-an.
Gin-athag man ni Trabado nga ang pagtapna sang Dengue ang indi lamang katungdanan sang mga opisyal sa probinsya sang Iloilo.
