ILOILO CITY – Personal nga ginpalab-ot sang isa ka empleyado sang Iloilo City Hall kay Presidential Spokesperson Atty. Salvador Panelo ang iya reklamo batok kay Iloilo City Mayor Jerry Treñas.
Sa programa nga Digong 8888 Hotline sang People’s Television Network sa diin nagaserbe nga host si Panelo, ginpatpat ni Rosita Camacho, Special Operations Officer 3 sa Iloilo City Hall, ang ginapahayag pagwaslik-poder ni Treñas.
Matandaan nga kaso nga Grave Coercion, Anti-Graft and Corrupt Practices Act, Grave Misconduct kag Oppression ang ginpasaka sang tagreklamo batok kanday Treñas, Iloilo City Administrator Melchor Tan, Executive Assistant kag Assistant Iloilo City Administrator Noel Panaguiton, Iloilo City Government Assistant Department Head 2 Josephine Agudo kag Iloilo City Human Resource Management Officer Leo Elevencione bangud sa paghimbunanay sang nakaligad nga May 13 midterm elections.
Suno kay Camacho, ginpatu patu-an siya nga nagbulig sa kandidatura ni anay Mayor Jose Espinosa III kag bangud sini, ginpilit siya ni Treñas nga mag-leave sa sulod sang 6 ka bulan.
Ginpahayag man ni Camacho nga bilang empleyado sang Iloilo City Hall, ginakabig niya nga boss sa trabaho ang sin-o man ang nagaserbe nga alkalde apang indi matuod nga naga-intra siya sa pulitika.
Samtang, wala naman nalingkang si Treñas matapos sa nangin lihok ni Camacho.
Suno kay Treñas, wala siya nahadlok bangud nga wala man siya sang may ginhimu nga sala kag may yara man siya sang pamatuod batok kay Camacho.
Ginpahayag man sang alkalde nga iya atubangon ang kaso nga ginpasaka sa iya samtang si Camacho naman ang may yara sang pending nga kaso sa City Legal Office.
