ILOILO CITY – Nakadepende na sa Oplan Hawan team kun ano ang dangatan sang tanan nga obstruction sa Brgy. Railway, La Paz, Iloilo City.
Ini ang may kaangtanan sa ginapahayag pagpamatok ni Task Force on Moral and Values Formation Head Nestor Canong nga ipaguba ang porsyon sang iya balay nga nagalaksam sa dalan.
Sa interview sang Bombo Radyo kay Punong Barangay Reynaldo Guillargan sang nasambit nga lugar, iya ginpahayag nga indi niya matumod ang numero sang obstruction sa ila lugar apang ang pat-od lang suno sa iya amo nga sa Oktubre 28, natalana ang pagpangguba sang composite team.
Suno kay Guillargan, indi niya mapangunahan ang composite team may kaangtanan sa pagpangguba sang obstructions.
Ginpahayag ni Guillargan nga may impormasyon siya nga nabaton nga kun indi pag-ipaguba ni Canong ang porsyon sang iya balay, magapamatok man ang iban nga pumuluyo.
Bilang Punong Barangay suno sa natungdan, nagalaum siya nga sundon sang iya mga pumuluyo ang ginapatigayon nga Oplan Hawan agud nga wala sang problema.
