ILOILO CITY – Nakabaton na sang official communication ang Maritime Industry Authority 6 gikan sa central office may kaangtanan sa pagbalik sang trapal sang mga pump boat nga nagabiyahe Iloilo-Guimaras vice versa.
Sa interview sang Bombo Radyo kay Maritime Industry Authority 6 Director Engr. Jose Venancio Vero, iya ginpahayag nga nabaton na niya kaina sang aga ang memorandum nga mahimo na mabutangan sang trapal ang mga pump boat.
Suno kay Vero, iya nga sapulon subong nga hapon ang Philippine Coast Guard kag pump boat operators sang Buenavista kag Jordan agud istoryahan ang specification sang trapal kag kun san-o na ipatuman ang nasambit nga pagsulundan.
Ginpahayag ni Vero nga kinahanglan nga takson ang trapal santo sa specifications nga ginpaguwa ni Department of Transportation Sec. Arthur Tugade.
Gin-athag man sang natungdan nga bisan nga ginpahanugutan na ang paggamit sang trapal apang nagakinahanglan nga sundon sa gihapon ang mandatory nga pagsuksuk sang life jacket, 75% ang passenger capacity, sunrise to sunset ang operations kag dapat may yara sang radio distress signal ukon communications ang tagsa ka pump boat.
