GUIMARAS – Igalunsyar sang Department of Tourism 6 ang #LoveGuimaras Campaign agud itib-ong ang tourist destination sa Guimaras.
Sa interview sang Bombo Radyo kay Department of Tourism 6 Director Atty. Helen Catalbas, iya ginpahayag nga gindula na lang ang Umbrella Festival nga una ginpahibalo sang ahensya kasunod man sang advisory sang Maritime Industry Authority nga ibalik ang trapal sa mga pump boat.
Suno kay Catalbas, ang mga payong nga igahatag sang Department of Tourism ang gamiton na lang sa embarkation kag disembarkation.
Ginpahayag ni Catalbas nga lakip sa #LoveGuimaras Campaign ang pagpinta sang mural sa mga pump boat agud nga mangin maayo sa panulukan sang mga pasahero ilabi na sa mga dumuluong.
Gin-imbitar sang natungdan ang publiko nga magpasakop sa soft launching sang #LoveGuimaras Campaign nga patigayunon sa Oktubre 31.
