GUIMARAS – Welcome development para sa Guimaras Provincial Government ang pagpahanugot sang Department of Transportation nga ibalik ang pagbutang sang trapal sa pump boat nga nagabiyahe Iloilo-Guimaras vice versa.
Sa interview sang Bombo Radyo kay Guimaras Vice Governor John Edward Gando, iya ginpahayag nga ang nasambit nga development ang bunga sang pagbinuligay sang mga opisyal sa probinsya sang Guimaras.
Suno kay Gando, naatrasar lang ang pagpaguwa sang memorandum sang Maritime Industry Authority bangud sa mga kaso nga ginpasaka sang pila ka grupo batok sa ahensya.
Ginpahayag ni Gando nga mas maayo na lang nga bisan atrasado apang ginpaboran sang ahensya ang ginahingyo sang mga pumuluyo.
Sa subong suno kay Gando, ila naman nga sentrohan ang pagpatuman sang nasambit nga memorandum.
