ANILAO, ILOILO – Na-utod ang tie rod end sang elf truck rason nga nawad-an sang kontrol ang driver sa pagmaneho sa natabo nga aksidente sa Barangay Mostro, Anilao, Iloilo.
30 ang pilason samtang isa naman ang patay nga amo si Helen Parcon, 61 anyos sang Balabag, Anilao.
Sa interview sang Bombo Radyo kay Pol. Lt. Jose Oswald Gatuslao, hepe sang Anilao Municipal Police Station, iya ginpahayag nga ginabanta 40 ang sakay sang 8 wheeler truck ukon ang ginatawag nga bagon.
Suno kay Gatuslao, matapos ang kumpanyar, naghapit ang mga biktima sa balay sang namatyan agud nga magkaon.
Sang papauli na ang mga biktima sa diin sakay sila sa nasambit nga truck, nadulaan ini sang preno sang nagdulhog na sa mataas nga bahin sang Mostro.
Pahayag pa niya, ginkabig sang driver nga si Junard Calvo sang Balabag, Anilao pawala ang truck bangud kun wala niya ini ginhimo, mahimo nga mahulog ang truck sa pil-as nga yara sa natuo nga bahin.
Nagbalabag ang truck sa mataas nga bahin sang dalan kag natumba rason sang pagka-awas sang mga pasahero.
Ang napatay nga si Parcon ang napilpilan sang barandilya nga tubo ang iya nga ulo.
Dugang pa sang hepe, nalagyo pa si Calvo bangud sa kakulba apang nagsungka man ini gilayon kag sa subong yara na siya sa kustodiya sang mga kapulisan.
Nakadepende naman sa mga biktima kun bala mapasaka sila sang kaso batuk sa nasambit nga driver.
