ILOILO CITY – Yara sa blue alert status ang bug-os nga syudad sang Iloilo umpisa buwas nga adlaw, Nobyembre 1.
Sa interview sang Bombo Radyo kay Donna Magno, pinuno sang City Disaster Risk Reduction and Management Office, iya ginpahayag nga sa tion nga yara sa blue alert status ang syudad sang Iloilo, nagakahulugan lamang ini nga bukas ang command center sa paghatag sang bulig ilabi na sa tion sang emerhensya.
Suno kay Magno, may yara sang tatlo ka komitiba nga gintukod agud nga magtutok sa pagpatigayon sang tigkalalag sa diin kabahin diri amo ang Safety Committee, Security Committee kag Emergency Preparedness Committee.
Ginpahayag ni Magno nga ang Safety committee ang pagabug-usan sang Public Safety and Transportation Management Office, City Engineer’s Office, City Environment and Natural Resources Office kag Iloilo City Anti-Smoking Task Force.
Ang Security Committee ang pagabug-usan sang Philippine National Police, barangay tanod kag iban pa nga force multiplier samtang ang Emergency Preparedness committee naman ang pagabug-usan sang City Disaster Risk Reduction and Management Office, City Health Office kag Bureau of Fire Protection.
May yara sang naka stand-by nga ambulansya sa tatlo ka mga dalagko nga patyo sa syudad kasubong sa Jereos sa La Paz, Quintin Salas sa Jaro kag Tanza sa City Proper.
Kadungan sini, nagpahanumdum man ang natungdan nga ginadumili-an sa sulod sang patyo ang pagdala sang hinganiban.
Ginadumili-an man ang mga vendor nga magbaligya sa mga lugar nga mahimo makatuga sang sablag sa mga nagapadulong sa patyo.
