ILOILO CITY – Nagalaom ang Public Safety and Transportation Management Office nga wala sang insidente ukon aksidente nga matabo ilabi na sa mga dalanon sa syudad sang Iloilo subong nga adlaw.
Sa interview sang Bombo Radyo kay Mr. Jeck Conlu, Public Safety and Transportation Management Office head, iya ginpahayag nga indi tuman ka damo ang mga tawo nga nagbisita sa mga patyo sa syudad sang Iloilo kaina sang aga.
Suno kay Conlu, mahimo subong nga mga inoras tubtob karon sa gab-i magadugok ang mga tawo sa patyo agud bisitahon ang ila mga pinalangga nga nagtaliwan.
Ginakabig man niya nga ang tigkalalag ang isa sa pinakadako nga preparasyon nga ginhimo sang syudad agud nga masiguro nga mas mangin maayo ang subong nga tuig ipaanggid sang 2018.
Dugang pa sang natungdan, 1,040 ka mga personnel ang ginpang deploy sa mga patyo lakip na ang Bureau of Fire Protection, Philippine National Police, Philippine Coast Guard kag Iloilo City Government.
Magluwas sa mga patyo, makit-an man ang mga personnel sang Public Safety and Transportation Management Office kaupod ang Philippine National Police nga yara sa dalan agud man nga magbantay sa trapiko.
