ESTANCIA, ILOILO – Indi big deal ang pagtindak ni Iloilo Police Provincial Office Director Pol Col Roland Vilela sa hepe sang Estancia Municipal Police Station.
Ini ang ginpahayag ni Pol. Major Rene Obregon Jr. nga isa sa mga hepe nga gintindakan ni Vilela sa quinto distrito sa probinsya sang Iloilo.
Sa interview sang Bombo Radyo kay Obregon, iya ginpahayag nga sala ang ila pagbutang sang signages sa guwa sang sementeryo kag indi organisado ang pwesto sang mga nagabaligya sang kandila rason nga naakig si Vilela kag ginsipa ini sa atubang sang madamo nga tawo.
Suno kay Obregon, wala siya sang kalain sang buot kag nahangpan niya nga kabahin lang sang pagdisiplina sa ila ang pagtindak sa iya sang direktor.
Nahibaluan nga padayon nga naga inspeksyon si Vilela sa mga sementeryo kadungan sang obserbasyon sang All Saints Day kag All Souls Day
