ILOILO CITY – Nangin tradisyon na sang isa ka iloy ang pagsindi sang kandila kag ang paghalad sang pangamuyo sa iya nagtaliwan nga anak.
Sa interview sang Bombo Radyo kay Ludivina Guerra, iya ginpahayag nga masobra pa lang sa isa ka tuig nga nalubong sa Jaro Catholic Cemetery ang anak nga si Michelle, 23 anyos bangud sa balati-an sa tagipusu-on.
Suno kay Guerra, sang ginahaya pa lang sadto si Michelle, masami na niya ini nga ginadamgo.
Ginpahayag ni Guerra nga nagpadayon ang iya nga pagdamgo kay Michelle nga nagapangasubo sa iya nga pagtaliwan kag nailo ang iya duha ka kabataan.
May tion man suno kay Guerra nga iya nadamguhan nga nagahilibi-on sa sulod sang lulubngan ang iya nagtaliwan nga anak.
Agud nga mauntat ang iya nga pagdamgo, ginpahayag sang natungdan nga nangin gawi na niya sa tagsa ka bulan ang pagpadulong sa patyo agud bisitahon ang lulubngan ni Michelle.
