NORTH COTABATO – Nagapanawagan sang bulig ang mga pumuluyo sang North Cotabato agud mahatagan sang ila kinahanglanon bangud sa pagtay-og sang asud-asud nga linog.
Sa exclusive interview sang Bombo Radyo kay North Cotabato Board Member Joemar Cerebo, iya ginpahayag nga 17 na ka mga tawo ang nagkalamatay bangud sa makapila ka beses nga pagtay-og sang mabaskog nga linog sa pipila ka porsyon sang Mindanao.
Suno kay Cerebo, 82 ka mga tawo ang nagapabilin sa ospital samtang 890 naman ang nakaangkon sang minor nga kapilsan; kag walo pa ang nagapabilin nga missing.
Sa rekord naman sang Provincial Disaster Risk Reduction and Management Office, 20,632 ka mga panimalay sa Cotabato ang totally damaged samtang 4,747 naman ang partially damaged; 327 ka mga eskwelahan ang nagkalaguba samtang 183 ka mga barangay hall kag health center ang apektado man.
Pahayag niya, may yara sang 19 tanan ka mga evacuation center ang North Cotabato.
Dugang pa sang board member, 27,880 ka mga pamilya ang apektado bangud sa asud-asud nga pagtay-og sang mabaskog nga linog.
Nagpasalamat man ang natungdan sa mga padayon nga nagabulig sa Mindanao pinaagi sa paghatag sang mga relief goods kag iban pa nga kinahanglanon sang mga pumuluyo.
