ILOILO – Malipayon si Iloilo 3rd District Congressman Lorenz Defensor nga ginpaboran sang mga ahensya nga may kahilabtanan sa tubig ang iya hagna nga ginfile ukon ang House Bill No. 2514 may kaangtanan sa pagpatukod sang Department of Water Resources.
Ang mga ahensya nga nagpabor sa pagpatukod sang water department amo ang National Water Resources Board nga yara sa idalom sang Department of Environment and Natural Resources, Metropolitan Waterworks and Sewerage System, Local Water Utilities Administration, National Irrigation Administration kag iban pa.
Sa interview sang Bombo Radyo kay Cong. Defensor, iya ginpahayag nga sa tion nga mapasar na bilang layi ang nasambit nga hagna, mahimo na nga masolusyonan ang mga problema sa tubig.
Suno kay Defensor, katungdanan sang Department of Water Resources amo nga siguraduhon nga matinlo, safe kag sustainable ang tubig nga gamiton sang publiko.
Pahayag pa niya, yara na sa commitee on Government Re-organization ang nasambit nga hagna.
Ini bangud nga nag-isa ang mga kongresista nga nagaduso sa pagpatukod sang nasambit nga departamento nga maghimo na lamang sang isa ka hagna sa diin indi na nila kinahanglan pa nga mag debate.
Dugang pa sang natungdan, ang potable, irrigation kag flood control ang mangin sa idalom man sang Department of Water Resources.
