ILOILO – Gin-athag sang National Irrigation Administration nga wala nagatindog ang Jalaur River Multi-Purpose Project sa West Panay Fault.
Sa interview sang Bombo Radyo kay Engr. Jonel Borres, Division Manager B sang Engineering Division sang National Irrigation Administration – Jalaur River Multi-Purpose Project II, iya ginpahayag nga ang Jalaur River Multi-Purpose Project ang nagatindog 10 kilometros nagikan sa West Panay Fault.
Suno kay Borres, makabig nga safe ang dam kag wala sang nagakadapat nga kahangaw-an sa tion nga magtay-og ang linog sa Iloilo.
Dugang pa sang natungdan, ang Jalaur Dam ang masarangan nga magtindog tubtob sa 8.5 magnitude nga linog.
Samtang ginpasiguro naman ni Engineer Jose Roberto Papa Jr., Filipino Consultant, Korean Rural Community Joint Venture kag Designer sang Jalaur River Multi-Purpose Project II, nga mabakod ang dam kag indi dali-dali nga magguba.
Suno kay Papa, yara sa maayo nga estado ang monitoring sang Korean Rural Community Joint Venture sa National Irrigation Administration sa padayon nga pagtukod sang Jalaur Dam.
Dugang pa niya, sa tion nga magtay-og ang mabaskog nga linog nga mangin resulta sang pagakaguba sang mga imprasktraktura, ang Jalaur Dam ang magapabilin sa gihapon nga nagatindog.
