ILOILO CITY – Padayon nga nagapanawagan ang Philippine Coast Guard-Iloilo sa may mga bulawanon nga tagipusuon agud makahatag sang kinahanglanon sang mga apektado sang asud-asud nga linog sa Mindanao.
Sa interview sang Bombo Radyo kay Capt. Erlinda Benliro, station commander sang Philippine Coast Guard Iloilo, iya ginpahayag nga humalin sang Nobyembre 1, nakapadala na sang halos 10,000 ka mga family food packs kag 1,000 ka mga malong sa Department of Social Welfare and Development Region 12 gamit ang Barko ng Republika ng Pilipinas Cape Engaño.
Suno kay Benliro, ang mga food packs ang nagikan mismo sa Department of Social Welfare and Development Field Office VI.
Apang mahimo man nga makadiretso sa ahensya sang Philippine Coast Guard kun may ihatag nga gamit, pagkaon ukon tubig sa mga biktima sang linog.
Dugang pa sang natungdan, mahimo subong ukon bwas nga adlaw madul-ong na ang mga food packs sa Mindanao.
