ILOILO CITY – Ginahulat na lang sang Iloilo City Government ang sulat sang Panay Railways Inc. nga nagahingyo sang bulig nga ipaguba ang mga obstruction nga napahamtang sa ginapanag-iyahan nga duta sang kompaniya sa Brgy. Railway, La Paz, Iloilo City.
Ini ang kasunod sang pagsinapol nga ginpatawag ni Iloilo City Mayor Jerry Treñas tuhoy sa ginapahayag pagpakatig-a sang pila ka mga tenant sa duta sang Panay Railways Inc. may kaangtanan sa ginapatuman nga Oplan Hawan.
Sa interview sang Bombo Radyo kay Executive Assistant for Barangay Affairs Jose Fernando “Boyet” Rico, iya ginpahayag nga nangin maayo ang resulta sang pagsinapol.
Suno kay Rico, nagpahayag sang kaahandaan ang pamunu-an sang Panay Railways Inc. nga pahalinon ang iban nga tenants nga ginakabig obstruction.
Ginpahayag ni Rico nga magluwas sa nasambit nga kompaniya, isa man sa nagpabutyag sang kahandaan amo si Task Force on Moral and Values Formation Head Mr. Nestor Canong.
Si Canong mismo suno kay Rico ang nagtanyag nga ipaguba ang porsyon sang iya balay nga nagalaksam sa dalan.
