ILOILO CITY – Ginbalik sang National Grid Corporation of the Philippines ang basol sa Panay Electric Company may kaangtanan sa natabo nga blackout sang nagligad nga semana.
Sa interview sang Bombo Radyo kay Michelle Visera, pinuno sang regional communications sang National Grid Corporation of the Philippines, iya ginpahayag nga indi matuod nga ang kompaniya ang may yara sang problema rason nga malawig nga nag-antos ang mga pumuluyo sa syudad sang Iloilo bangud sa power interruption.
Suno kay Visera, nagkulang ang electric supply sang submarine cable sang National Grid Corporation of the Philippines apang amat-amat nga nabalik ang kuryente umpisa 8:30 sang aga.
Paglab-ot sang 10:30 sa aga, ginpahayag ni Visera nga kalabanan sa mga electric company sa Panay ang balik na sa operasyon apang may pipila sa gihapon ang nagapabilin nga shutdown kag isa na diri ang Panay Electric Company.
Ginpahayag ni Visera nga matuod nga ang National Grid Corporation of the Philippines ang nagahatag sang clearance sa mga electric company kag power plant apang sa tion lang nga may yara sang bastante nga supply sang kuryente.
Sang adlaw nga natabo ang blackout, ginpahayag sang natungdan nga maathag nga ang may yara sang deperensya ang Panay Electric Company sa baylo nga ang National Grid Corporation of the Philippines.
