ILOILO – Ginpatpat ni Iloilo 5th District Congressman Raul Buboy Tupas ang na-istoryahan sa pagsinapol sa Kamara kahapon nga adlaw.
Sa interview sang Bombo Radyo kay Cong. Tupas, iya ginpahayag nga isa ka organizational meeting ang ginhiwat kahapon nga ginpangunahan sang Committee on National Defense and Security sa diin gin-istoryahan ang sitwasyon sang pungsod, Operational Readiness sang Armed Forces of the Philippines kag National security threat.
Suno kay Tupas, wala na istoryahan ang ginapahayag pagpang-harass sang Chinese naval warship sa Greek-owned oil tanker nga Green Aura nga ginabug-osan sang mga Filipino crew malapit sa Panatag Shoal nga natabo sang Setyembre.
Naghingyo ang Department of National Defense sa nasambit nga komitiba nga hatagan sang atensyon ang paghatag sang dugang mga mga equipment sa Armed Forces of the Philippines.
Nagaproblema ang Armed Forces of the Philippines bangud nagaka delay ang kinahanglan nga equipment kag assets.
Isa sa mga rason suno kay Tupas amo ang maid-id nga procurement process sa pondo sa diin may yara ini sang tatlo ka mga phase nga ginalakipan sang Horizon 1, Horizon 2 kag Horizon 3.
Ang AFP Modernization ang nagakadapat nga i-implementar sa tatlo ka mga phases nga ginatawag Horizon 1 sa tuig 2012 tubtob 2017; Horizon II, sa tuig 2018 tubtob 2022; kag Horizon III, sa tuig 2023 tubtob 2027.
Pahayag ni Tupas, sa Horizon 1, may nabilin pa nga 30% nga pondo bangud ini ang tuman ka dako.
Dugang pa sang natungdan, kuntani ma tapos na ang Horizon 2 sa tuig 2022 apang bangud nga may nabilin pa nga pondo sa Horizon 1, mahimo nga ma delay ang mga equipment nga kinahanglanon.
Apang nagalaom sa gihapon ang Armed Forces of the Philippines nga ma deliver ang mga helicopters sa masunod nga tuig nga kabahin sang Horizon 2.
