ILOILO CITY – Gina abi-abi sang Philippine Drug Enforcement Agency ang pag-appoint kay Vice President Leni Robredo bilang co-chairman sang Inter-Agency Committee on Anti-illegal Drugs (ICAD).
Sa interview sang Bombo Radyo kay Philippine Drug Enforcement Agency 6 director Alex Tablate, iya ginpahayag nga isa ka welcome development ang panibag-o nga appointment ni Robredo.
Suno kay Tablate, mas makapaayo nga yara sa Inter-Agency Committee on Anti-illegal Drugs si Robredo agud nga makabulig sa paghatag sang suhestyon ukon rekomendasyon sa pagtapna sang illegal drugs sa pungsod.
Ginpahayag ni Tablate nga ang nasambit nga komitiba ang natukod paagi sa isa ka executive order sa katuyu-an nga pasangkaron ang Anti-Drug War campaign sang gobyerno.
Ang nasambit nga komitiba suno sa natungdan ang ginabug-usan sang apat ka cluster nga ginabug-usan sang nanari-sari nga ahensya sang gobyerno samtang ang nagaserbe nga chairman amo si Philippine Drug Enforcement Agency Director General Aaron Aquino.
Sa subong suno sa opisyal, indi lang ang pili nga law enforcement agency ang nakatuon sa pagpatuman sang Anti-Drug War campaign sa baylo mangin holistic na ang pagpatuman sini paagi sa bulig sang iban nga ahensya sang gobyerno.
