ILOILO CITY – Akig si Iloilo City Mayor Jerry Treñas sa nangin pahayag ni Marcelo Cacho nga amo ang administrative manager sang Panay Electrioc Company may kaangtanan sa mga nagakatabo nga mga post fire sa syudad sang Iloilo.
Ini matapos nga ginpahayag ni Cacho nga wala sang dako nga isyu sa mga post fire.
Sa interview sang Bombo Radyo kay Mayor Treñas, iya ginpahayag nga kun seguridad sang mga pumuluyo kag propedad sang syudad ang pagahambalan, indi ini makabig nga gamay nga butang.
Suno kay Treñas, kun para kay Cacho gamay nga butang lamang ang mga post fire, iya ini diretso sa iya nga kabuhi.
Ginkwestyon man sang alkalde si Cacho kun bala gamay lang nga butang para sa iya ang kabuhi sang mga Ilonggo.
Samtang ginapa-auction naman sang alkalde ang propedad sang Panay Electric Company bangud tubtob subong wala sa gihapon nakakuha sang business permit ang nasambit nga kompaniya.
Suno kay Treñas, may yara pa sang balaydan ang PECO nga P90 million sa buwis humalin pa sang si anay Iloilo City Mayor Jed Patrick Mabilog ang nagapungko bilang alkalde.
Indi man mahimo nga ipasirado sang alkalde dugang pa niya ang kompaniya bangud maapektuhan ang mga pumuluyo sang syudad nga indi mahatagan sang kuryente.
Sa subong, may yara naman sang grupo sang Energy Regulatory Commission nga nagalibot sa syudad agud nga i-verify ang problema sa mga post fire sang Panay Electric Company.
