ILOILO CITY – Ipapreso gid ni Iloilo City Mayor Jerry Treñas ang sin-o man nga madakpan nga nagapanggabot kag nagapang-utod sang tanum sa palibot sang syudad bilang kabahin sang Beautification program.
Sa interview sang Bombo Radyo kay Treñas, iya ginpahayag nga pagpanghalit ang ginahimu nga pagpanggabot kag pagpang-utod sang tanum nga amo ang nagahatag sang duag sa palibot.
Suno kay Treñas, indi niya mahangpan kun nga-a may mga tawo nga nagapanghalit kag indi maluyag nga mag-uswag ang syudad.
Wala man napunggan ni Treñas nga magpabutyag sang kaugot kasunod sang pagpanggabot sang mga bulak kag pag-utod sang palm tree.
Samtang, magapangatubang sang kaso nga malicious mischief ang lalaki nga nagpanggabot sang tanum sang nagligad nga Nobyembre 9 sa General Luna St., Iloilo City.
Ini matapos nga nadakpan ang suspek nga si Winston Duardo Paja, 38, sang Brgy. Mansaya, Lapuz, Iloilo City kag ginapahayag nga may yara sang deperensya sa panghuna-huna.
Bangud nga pila na ka adlaw ang nakaligad antes nadakpan ang suspek, regular filing ang sundon sang otoridad sa pagpasaka sang kaso batok kay Paja.
Sa interview sang Bombo Radyo sa suspek nga si Paja, iya ginpahayag nga ginakaon sang demonyo ang iya lawas rason nga nahimo niya ang pagpanggabot sang tanum.
Ginpanginwala man ni Paja nga hubog siya ukon may yara sang deperensya sa panghuna-huna samtang gina-interview sang Bombo News Team.
Samtang nagadugay, kasubong nga wala nagasanto ang ginabuy-an nga pahayag ni Paja.
Nahibalu-an nga ang mga barangay official sang Danao, Iloilo City ang nakadakop sa suspek.
