ILOILO CITY – Nagakinahanglan nga ipaidalom sa medical assesment ang nadakpan nga suspek nga nagpanggabot sang tanum sa General Luna St., Iloilo City.
Sa interview sang Bombo Radyo kay Dr. Ma. Rebecca Conlu-Gregorios, District Medical Officer sang Lapuz-Bo. Obrero Health Center, iya ginpahayag nga nagakinahanglan nga makumpirma kun bala may yara gid man sang deperensya sa panghuna-huna ang nadakpan nga si Winston Duardo Paja, 38, sang Brgy. Mansaya, Lapuz, Iloilo City.
Suno kay Gregorios, kun matuod nga may deperensya sa panghuna-huna si Paja, mas makapaayo nga mahatagan gilayon sang nagakaigo nga igtalupangod.
Ginpahayag man ni Gregorios nga kun bayolente ang pasyente, mas makapaayo nga i-admit sa mental hospital.
Antes pa man sini, ginpahayag ni Gregorios nga kinahanglan nga magpakig-angot ang mental health unit sa City Social Welfare and Development Office agud nga matumod ang pamilya sang pasyente.
Kun wala sang pamilya nga mag-ako, ginpahayag sang natungdan nga mabudlay para sa ila bahin bangud nga wala sang may maga-asikaso sa pasyente.
