ILOILO CITY – Pending sa gihapon ang pagbaton sang aplikante sa pagkuha sang prangkisa may kaangtanan sa ginaduso nga Iloilo City Tricycle Franchising Regulatory Board.
Sa interview sang Bombo Radyo kay Iloilo City Councilor Romel Duron, chairman sang Committee on Transportation, iya ginpahayag nga may yara pa sang moratorium gikan sa Department of Transportation kag Department of Interior and Local Government tuhoy sa pagpanghatag sang prangkisa sa mga motorized kag non-motorized tricycle.
Suno kay Duron, madula lamang ang moratorium kun mahitso na ang pangkabug-usan nga transport route plan sa syudad sang Iloilo.
Ginpahayag ni Duron nga sang 2017 pa kun tani ini natapos apang wala ini madayon bangud sa kakulang sang pondo.
Indi madali-dali ang paghimu sang transport route plan bangud nga kinahanglan anay ini nga tun-an sang maayo.
May kaangtanan diri, ginpahayag sang natungdan nga may yara sang committee hearing nga patigayunon sa Lunes, Nobyembre 18, agud istoryahan ang tuhoy diri.
Kun madayon, ang Land Transportation Franchising and Regulatory Board na ang magahimu sang route plan santo sa rekomendasyon sang Local Government Unit.
