ILOILO CITY – Pormal na nga igalunsyar ang Human Rights Desk sa Western Visayas buwas nga adlaw.
Sa Good Morning Philippines program, ginpahayag ni Msgr. Meliton Oso, director sang Jaro Archdiocesan Social Action Center, ang Human Rights Desk ang yara sa idalom sang Jaro Archdiocesan Social Action Cneter kag pagapangunahan sang Commission on Human Rights ang paglunsyar sa bulig sang partner agencies.
Suno kay Msgr. Oso, may yara sang Human Rights Desk sa bug-os nga pungsod apang kasubong nga wala ini sang ngipon bangud man sa kakulang sang manpower.
Ginpahayag ni Msgr. Oso nga pagatutukan sang Human Rights Desk amo ang pagtib-ong, pagpangapin, pagtapna kag paghatag sang solusyon sa mga problema sa komunidad kasubong sang extra judicial killings, human trafficking, violence against women and children, red tagging kag iban pa nga sahi sang pagpang-abuso.
Antes ang paglunsyar sang Human Rights Desk, may patigayunon man nga data privacy forum sa Archbishop Palace ilabi na nga ang bulan sang Nobyembre ang gindeklarar sang Archdiocese of Jaro nga bulan para sa mga kubos.
