ILOILO CITY – Kulang ang isa ka termino agud nga mapatuman ang mga nakalinya nga proyekto sa isa ka barangay.
Ini ang rason ni Punong Barangay Barbie Aroza sang Nabitasan, La Paz, Iloilo City sa pagpabor nga ipaiway ang May 2020 elections.
Sa interview sang Bombo Radyo kay Aroza, iya ginpahayag nga sa iya bahin bilang Punong Barangay, madamu siya nga mga nakalinya nga programa nga natalana nga ipatuman sa ila lugar.
Halimbawa diri amo ang tuhoy sa pagpakay-o kag pagpahamtang sang foot bridge, pagpakay-o sang drainage system kag dalan nga yara sa mga eskinita.
Suno kay Aroza, kun madayon ang eleksyon sa masunod nga tuig, wala sang kasiguraduhan nga magadaug ang mga incumbent official rason nga mas makapaayo nga ipaiway anay ang eleksyon.
Ginpahayag man ni Aroza nga sa una nga termino, may yara pa sang adjustment ilabi na sa first timers nga elected official.
Ginpabugal naman sang Punong Barangay ang iya mga existing projects kasubong sa pagtapna sang illegal drugs, pagtapna sang kinagamo sa ila lugar, pagpahanumdum sa mga pumuluyo kun paano malikawan ang sunog, pagpahagan-hagan sang basura kag ang tuhoy sa pagtatap sang hinuptanan nga ido.
Ginatutukan sang natungdan ang information dessimination ukon pagpalapnag sang impormasyon sa mga pumuluyo tuhoy sa mga ginapatuman nga proyekto.
