STA. BARBARA, ILOILO – Wala pa sa gihapon nadakpan ang driver sang pick up nga salakyan nga nakabunggo-patay sa 17 anyos nga soltero sa Barangay Buyo, Sta. Barbara, Iloilo.
Sa interview sang Bombo Radyo kay Police Major Raymund Celoso, Officer In Charge sang Sta. Barbara Municipal Police Station, iya ginpahayag nga nagalakat sa kilid sang dalan ang biktima sang iya nakita ang pick up nga madasig ang pagdalagan.
Suno kay Celoso, apisar nga nagpahigad na ang soltero, na side-swipe gid sini sang pick up rason nga malayo ang pagtabog sang 17 anyos.
Dugang pa sang natungdan, bangud sa pagtabog sang soltero, nahulog pa ini sa kanal.
Sa subong, nagapanawagan ang otoridad sa kun sin-o man ang nagamaneho sang pick up nga nakabunggo sa soltero nga magsungka na sa kapulisan.
