ILOILO CITY – Aprubado na sa committee level sa Kamara ang redistricting sa syudad sang Iloilo.
Sa interview sang Bombo Radyo kay Iloilo City Lone District Congresswoman Julienne Jam-jam Baronda, iya ginpahayag nga duha ka mga distrito sa syudad ang luyag nga i-separar sa diin duha ka mga congressman ang magapangalagad sa syudad kag tag-pito ka mga konsehal sa kada distrito.
Suno kay Baronda, sa tion nga matigayon ang pagtunga sang syudad, pagabug-osan sang 1st District sang Iloilo City amo ang Jaro, Mandurriao kag LaPaz samtang sa 2nd district naman amo ang Molo, Arevalo, City Proper kag Lapuz.
Katuyuan sang pagtunga sa duha ka mga distrito agud nga mas madamo nga benepisyo, programa kag proyekto ang mahatag sa syudad sang Iloilo.
Pahayag niya, magapabilin sa isa lamang ka alkalde ang magapangalagad sa syudad sang Iloilo, duha ka mga Congessman kag tag pito ka mga konsehal sa tagsa ka mga distrito.
Dugang pa ni Baronda, magapabilin sa gihapon nga isa lang ang Iloilo City Hall apang ang District Offices ang magadugang.
Gin-athag man ni Baronda nga wala sang kahilabtanan ang isyu nga nagaguwa sa pagduso sang re-districting sang syudad bangud gina-alegar nga magapadalagan man si Senate Minority Leader Franklin Drilon sa pagka-congressman sa syudad sa masunod nga eleksyon.
Nahibaluan nga ini na ang last term bilang senador ni Drilon.
Depensa niya, wala sang may matabo sa syudad sang Iloilo kun panumdumon lang ang eleksyon.
Madugay na suno sa iya nga ginaduso ang redistricting sa syudad kag iya lamang ini nga ginpadayon.
