ILOILO CITY – Win-win solution ang katuyu-an sang Iloilo Economic Development Foundation Inc. sa pagpadala sang sulat kay Energy Regulatory Commission Chairperson Agnes Devanadera.
Ini ang may kaangtanan sa problema sa supply sang kuryente sa syudad sang Iloilo kag ang estado nga naga-apekto sa business sector kag sa mga konsumidor.
Sa interview sang Bombo Radyo kay Iloilo Economic Development Foundation Inc. Executive Director Francis Gentoral, iya ginpahayag nga ang Energy Regulatory Commisison ang may katungdanan nga magpatigayon sang imbestigayson tuhoy sa problema sa supply sang kuryente.
Suno kay Gentoral, magluwas sa masami nga power interruption, dapat man nga usisaon kun ano ang rason sang masami nga sunog sa diin kuryente ang ginatudlo nga kabangdanan.
Ginpahayag ni Gentoral nga magluwas sa nasambit nga mga problema, dapat man nga hitsuhon sang ahensya ang tuhoy sa problema sa tunga sang Panay Electric Company kag MORE Electric and Power Corporation.
Ang sulat nga napetsahan sang Nobyembre 13 suno sa natungdan ang suporta sa sulat ni Iloilo City Mayor Jerry Treñas nga ginpadala sa Office of the President tuhoy sa nagakatabo nga pole fire incident.
Nagalaum si Gentoral nga gilayon nga maaktuhan sang Energy Regulatory Commission ang tuhoy sa nakasaad sa sulat agud nga indi mag-agunto ang pumuluyo kag ang mga negosyante sa syudad sang Iloilo.
