ILOILO CITY – Ginatutukan sang Iloilo City Government kun paano ang nagakaigo nga hauling kag disposal sang medical waste halin sa mga hospital sa syudad sang Iloilo.
Ini ang nangin sentro sang ginpatigayon nga pagsinapol nga ginpangunahan ni Iloilo City Councilor Ely Estante, Chairman sang Committee on Environment and Natural Resources kaupod si City Environment and Natural Resources Office Head Engr. Noel Hechanova kag mga tiglawas gikan sa nagkalain-lain nga hospital.
Sa interview sang Bombo Radyo kay Estante, iya ginpahayag nga dapat nga tutukan sang Iloilo City Government ang tuhoy sa nagakaigo nga disposal sang medical waste nga makabig nga peligroso sa ikaayong lawas sang pumuluyo.
Suno kay Estante, nagalab-ot sa 100-400 kilograms nga medical waste ang natipon sa tagsa ka adlaw kag wala pa diri nadala ang industrial kag household waste.
Ginpahayag ni Estante nga ang basura halin sa mga hospital ang indi mahimo nga ihaboy lang sa sanitary landfill sa Brgy. Calajunan sa distrito sang Mandurriao bangud nga mahimo nga maglapta ang kagaw.
Mas makapaayo suno kay Estante nga magpatukod sang pyrolysis plant apang samtang wala pa sang makinarya nga magamit, kinahanglan nga mapangitaan sang sabat ang nasambit nga problema.
Sa pagkamatuod suno sa natungdan, may yara sang kontraktor sadto nga amo ang in-charge sa quarterly nga hauling kag disposal sang medical waste apang ini ang temporaryo nga ginpauntat bangud sa kakulang sang mga requirements.
