ILOILO CITY – Halos naplastar na ang patigayunon nga mga aktibidad may kaangtanan sa Dinagyang Festival 2020.
Sa interview sang Bombo Radyo kay Eric Divinagracia, chairman sang tribes and artistic committee, iya ginpahayag nga nahitso na ang ruta nga paga-agyan sang mga tribu nga magapakigbahin sa Dagyang sa Calle Real kag sa Dinagyang Ati Tribes Competition.
Suno kay Divinagracia, mangin sentro sang kahiwatan amo ang indigenous culture sang Panay, si Sr. Sto. Niño kag ang pagdagyang.
Magluwas sa nasambit nga aktibidad, ginahitso na sa subong ang tuhoy sa Pamukaw nga patigayunon sa Disyembre.
Sa Enero 10, 2020, 3:00 sa hapon, patigayunon ang Opening Salvo nga may tema tuhoy sa Endemic species sa rehiyon.
Samtang, ginpahayag man sang natungdan nga wala sang problema kun subsidy para sa mga tribu ang pagahambalan.
