ILOILO – May yara sang daku nga katungdanan ang mga ginikanan agud nga madisiplina ang ila kabataan.
Ini ang ginpahanumdom ni Catherine Lamprea, Social Welfare Officer sang Department of Social Welfare and Development 6, kadungan sang pagsaulog sang Juvenile Justice and Welfare Consciousness Week umpisa buwas nga adlaw.
Sa Good Morning Philippines program, ginpahayag ni Lamprea nga ang nasambit nga selebrasyon ang nag-umpisa sang ginpirmahan ni anay Presidente Benigno Aquino III ang proclamation number 489 nga nagadeklarar sa ika apat nga semana sang Oktubre bilang Juvenile Justice and Welfare Consciousness Week.
Apang bangud nga may yara sang Republic Act 10661 nga nagadeklarar nga ang bulan sang Nombyembre amo ang National Children’s Month, ginsaylo man ang pagsaulog sang Juvenile Justice and Welfare Consciousness Week nga may yara sang katuyu-an nga itib-ong kag ipalapnag ang children’s rights.
Suno kay Lamprea, sakop sang Juvenile Justice System amo ang mga pamatan-on nga naga-edad sang 17 anyos panubo ilabi na ang mga children in conflict with the law.
Ang children in conflict with the law amo ang mga nakahimo sang krimen, nagalapas sa ordinansa kag ang mga nagabisyo nga nagakinahanglan sang pagtamod.
Ginpahayag man sang natungdan nga agud nga malikaw sa malain nga buluhaton ang mga pamatan-on, kinahanglan nga indi magpabaya ang mga ginikanan.
