ILOILO CITY – Nagaserbe nga basehan sang Police Regional Office 6 ang existing Anti-Smoking Ordinance sa syudad sang Iloilo tuhoy sa pagkumpiskar sang vape gikan sa mga madakpan nga nagagamit sa pampubliko nga lugar.
Sa data sang Police Regional Office 6, 4 ka vape ang nakumpiska apang nauna na nga gin-athag ni Police Lt. Colonel Joem Malong, tagpamaba sang Police Regional Office 6, nga indi kinahanglan nga ikumpiskar ang vape.
Sa interview sang Bombo Radyo kay Malong, iya ginpahayag nga ang ila basehan sa pagdakop amo ang tuhoy sa mandu ni Presidente Rodrigo Duterte kag ang existing Anti-Smoking Ordinance.
Suno kay Malong, may yara pa sang ‘gray areas’ nga nagakinahanglan sang paathag agud nga mangin maathag para sa mga pulis kun paano ipatuman ang mandu sang Presidente.
Ginpahayag ni Malong nga sa subong, ila anay nga sundon ang mandu nga pangdakpon ang mga nagagamit sang vape sa pampubliko nga lugar.
Samtang suno naman kay Iloilo City Police Office Director Police Colonel Martin Defensor Jr., ang apat ka vape nga nakumpiska sa apat ka mga nadakpan ang yara sa gihapon sa kustodiya sang Mandurriao PNP.
Suno kay Defensor, ang apat ka mga nadakpan ang ginhatagan sang citation ticket santo sa nakasaad sa existing ordinance.
Sa subong, ginpahayag ni Defensor nga ila pa nga ginahulat ang memorandum gikan sa regional headquarters agud nga maathagan sila tuhoy sa pagpatuman sang mandu sang presidente.
Sa ginpatigayon nga press conference, ginkumpirma man sang Iloilo City Police Office Director nga wala naistoryahan ang tuhoy sa confiscation sang vape.
