AJUY, ILOILO – Desidido ang Local Government Unit sang Ajuy, Iloilo nga padayunon ang moto propio investigation in aid of legislation batok sa isa ka High School teacher sa Ajuy, Iloilo.
Ini matapos ang film showing activity nga ginpatigayon sa duha ka section sang Grade 10 students sang Pili National High Scool sa diin makabig nga pornograhic material ang ginpalantaw sa mga estudyante.
Sa interview sang Bombo Radyo kay SB Member Angel Briones, iya ginpahayag nga kinahanglan nga imbestigaran gid ang ginapahayag pagpalantaw sang binastos nga film.
Suno kay Briones, siya mismo ang ginpalantaw man sang nasambit nga film apang sa iya nga pagduda, gin-edit na ini sang manunudlo.
Ginpahayag ni Briones nga makita sa film nga may yara sang naga-uba kag may yara sang sexual activity ang mga character sa diin depensa naman sang manunudlo, kabahin ini sa sex education sang mga estudyante.
Bangud sini, nagsulat na si Mayor Jett Rojas sa schools division superintendent tuhoy sa natabo nga film showing.
Sa Lunes, natalana nga ipatawag sang Sangguniang Bayan ang manunudlo bangud nga mismo si Mayor Rojas ang indi kumporme sa natabo.
