Nagtipon ang mga anay empleyado sang Vallacar Transit Incorporated agud ipalab-ot ang ila mga hinun-anon sa kompaniya.
Ang mga grupo sang anay empleyado ang ginatawag nga Displaced Ceres Workers Association.
Sa interview sang Bombo Radyo kay Antonette Jamelarin, tiayon sang ceres driver, iya ginpahayag nga siyam ka tuig nangin driver ang iya bana sang ceres bus apang na stroke ini rason nga wala na nakapadayon sa pagtrabaho.
Suno kay Jamelarin, mismo sa sulod sang bus na stroke ang iya bana kag sa iya pagkahibalo may yara ini sang insurance nga makuha.
Samtang ginareklamo man sang anay ceres driver nga si Mark Louie De Asis ang pag charge sa iya sang kompaniya bangud nakabunggo ang unit sang bus nga iya ginamaneho.
Suno kay De Asis, ginsuspende siya sang duha ka bulan sang 2017 bangud naaksidente ang bus nga iya ginamaneho.
Apang iya ginkakibot nga ginapabaydan pa sang kompaniya ang 50% nga damage sang unit sa iya nga ginabuhin sa iya sweldo.
Pahayag ni De Asis, nagalaom siya nga indi pagkaltasan sang kompaniya ang iya sweldo bangud sa iya pagdumdom mismo ang kompaniya ang masabat sa nagguba nga unit sang bus.
Nadesisyonan sang natungdan nga mag halin na lamang sa trabaho bangud sa kagamay nga sweldo nga iya nabaton kag ginabuhinan pa ini bangud ginapabayad sa iya ang P69,000 nga balor sang nagguba nga bus.
