ILOILO – Wala sang kakulba nga nabatyagan ang Ilonggo nga atleta nga isa sa mga magarepresenta sang Pilipinas sa 30th Southeast Asian Games sa Tunggal Pencak Silat.
Sa exclusive interview sang Bombo Radyo kay Edmar Tacuel, tumandok sang Nagba, Tubungan, Iloilo, iya ginpahayag nga 85% na siya nga handa sa iya nga hampang sa Disyembre 2 nga patigayunon sa Subic, Zambales.
Suno kay Tacuel, isa ka bulan ang iya preparasyon lakip na ang paghanas para sa 30th Southeast Asian Games.
Lunes, Myerkules kag Byernes ang training ni Tacuel umpisa alas-9 sa aga tubtob alas-11 sa aga para sa pagdevelop sang endurance kag balancing.
Ginahatagan man ang mga atleta sang duha tubtob tatlo ka oras nga magpahuway kag balik naman sa training alas dos sa hapon tubtob alas kwatro para sa skills training.
Pahayag niya, may yara man sila sang mga conditioning coach kag skills training coach agud obserbahan ang ila hulag kun ano ang maayo kag indi.
Dugang pa sang atleta, madugay na siya nga naga compete local, national kag international gani wala na siya sang kakulba nga nabatyagan batuk sa mga pungsod nga iya maka-kompetensya.
Ini na ang pang-apat nga international competition nga na intrahan ni Tacuel apang labing una ini nga Southeast Asian Games nga iya pasakopan.
Nagalaom ang atleta nga makuha niya ang gold medal sa Tunggal Pencak Silat.
Samtang wala man sang may itugda si Tacuel sa pagkaon nga ginaserbe sa ila nga mga atleta bangud lunsay man ini nga mga masustansya nga pagkaon.
Suno sa iya, mas manami ang Pilipinas mag host sang event ipaanggid sa iban nga pungsod bangud Pilipino ang mga nagaserbe sang pagkaon nga pat-od matinlo kag manamit gid ang pagkaluto.
