ILOILO CITY – Pormal na nga nag byahe ang mga modernized jeepneys sa syudad sang Iloilo.
Sa interview sang Bombo Radyo kay Rizal Alido, secretary sang Iloilo City Alliance Operators and Drivers Transport Cooperative, iya ginpahayag nga subong nga adlaw, pito pa lamang ka mga modernized jeep ang nakabyahe apang pagadugangan pa ini bwas nga adlaw sang 13 ka mga units.
Ang modernized jeep ukon mini bus ang may yara sang pito nga standing capacity samtang 23 naman ang sitting capacity.
Suno kay Alido, ang modernized jeepney ang sabat sa hingyo sang mga pumuluyo ilabi na ang mga empleyado kag estudyante nga luyag sang mas kumportable nga pagbayahe padulong sa mga opisina ukon eskwelahan.
Naga umpisa ang byahe sang modernized jeep sa Ungka Terminal ITGSI sa distrito sang Jaro padulong sa Fort San Pedro sa Iloilo City Proper.
Pahayag niya, sa tion nga magsaka ang pasahero, may yara sang passenger assistance officer nga magapamangkot kun bala regular, senior citizen ukon estudyante ang pasahero.
Ang passenger assistance officer ang may yara sang card nga para sa regular, senior citizen ukon estudyante sa diin gina tap lamang ini sa automatic fare collection system kag nagaguwa ang papel sa diin makit-an ang nagakadapat nga plete sang pasahero.
Magluwas sa automatic fare collection system, ginahitso naman ang beep card nga para sa mga pasahero agud nga wala na sang may ikolekta nga cash ang passenger assistance officer.
Kinahanglan lamang nga magbakal sang card ang pasahero kag ini ang gina swipe lamang sa tion nga magsulod sa modernized jeep.
May yara man sang iga-install nga loading machine para sa card sang pasahero sa mga terminal agud mahapos ang pag pa load sang card.
Nahibaluan nga fully airconditioned ang modernized jeep, automatic door, may apeaker, may camera sa atubang nga bahin sang driver agud makit-an ang mga pasahero sa likod niya.
May yara man sang fire extinguisher sa sulod sang salakyan, may free wifi kag ginaplanohan man ang pagbutang sang compartment para sa mga dala sang pasahero.
P10.20 naman ang plete sa modernized jeep para sa nga regular nga pasahero sa una nga apat ka kilometros nagikan sa Ungka ITGSI kag dugang nga P1.38 sa kada isa ka kilometro.
