ILOILO CITY – May yara sang deperensya ang power system sang Iloilo City Hall rason nga temprano pa subong nga adlaw nga nagpauli ang mga empleyado bangud nga wala sang kuryente.
Matandaan nga nag-early out kaina sang hapon ang mga empleyado matapos nga nadulaan sang supply sang kuryente ang Iloilo City Hall humalin 12:00 sa udto tubtub 5:00 sa hapon.
Sa interview sang Bombo Radyo kay Building Administrator Mitch Antiqueña, iya ginpahayag nga ang may deperensya amo ang power system ilabi na ang automatic transfer switch 2.
Suno kay Antiqueña, ang automatic transfer switch 1 amo ang nagasalo sang kuryente halin sa main line padulong sa automatic transfer switch 2 nga amo naman ang natuon sa distribution sang power supply sa tanan nga linya sang kuryente.
Ginpahayag ni Antiqueña nga indi pagbatunon sang automatic transfer switch 2 ang ginahatag nga supply nga kuryente sang automatic transfer switch 1 rason nga may yara sang power interruption nga natabo.
Gin-athag sang natungdan nga functional ang generator set sang Iloilo City Hall apang wala niya ini gingamit sa baylo, iya nga ginpahibalo si Iloilo City Mayor Jerry Treñas nga iya anay nga i-troubleshoot ang guba nga power system.
