ILOILO CITY – Ginpaidalom sa blue alert status ang bug-os nga syudad sang Iloilo bilang pagpanghanda sa pagsulod sa Philippine Area of Responsibility sang Typhoon Kammuri ukon may local name nga Bagyo Tisoy.
Ini ang kasunod sang pagpaguwa sang Executive Order 148 ni Iloilo City Mayor Jerry Treñas santo sa nakasaad sa Section 16 kag Section 445 sang Local Government Code of 1991.
Sa interview sang Bombo Radyo kay Treñas, iya ginpahayag nga ang kahulugan sang blue alert status amo nga activated na ang Iloilo City Emergency Operations Center.
Suno kay Treñas, ginabantayan ang mga lugar nga masami ginabaha agud nga makahatag gilayon sang abiso sa mga pumuluyo.
Ginpahayag ni Treñas nga ang Iloilo City Emergency Operations Center amo ang magahatag sang command, control, coordination kag communication sa mga ahensya sang gobyerno agud nga mapadasig ang paghatag sang bulig sa mga apektado sang bagyo.
