ILOILO CITY – Ginakabig ni Iloilo City Councilor Ely Estante nga welcome development ang Public Private Partnership tuhoy sa pagpahamtang sang Waste to Energy Facility sa Brgy. Calajunan sa distrito sang Mandurriao.
Ini ang may kaangtanan sa problema sa syudad sang Iloilo kun medical waste ang pagahambalan nga makabig peligroso sa ikaayong lawas.
Sa interview sang Bombo Radyo kay Estante, chairman sang Committee on Environment and Natural Resources, iya ginpahayag nga maayo nga balita ang tuhoy sa Public Private Partnership agud nga maka-angkon na sang Waste to Energy Facility ang syudad sang Iloilo.
Suno kay Estante, kun matigayon ang nasambit nga plano, indi na kinahanglan nga dal-on sa iban nga lugar ang medical waste.
Ginpahayag ni Estante nga samtang wala pa sang pasilidad, ila anay nga tun-an ang joint venture agreement sa tunga sang Iloilo City Government kag sang pribado nga kompaniya nga amo sadto ang natuon sa hauling kag disposal sang medical waste.
Sa Disyembre 6 suno sa konsehal, hibaluon nila ang rason kun nga-a nauntat sadto ang operasyon sang pribado nga kompaniya agud nga ini ang matadlong kag mangin alternatibo nga sabat sa problema.
