ILOILO CITY – Pabor si Iloilo City Councilor Ely Estante sa ginaduso nga General Liability Insurance sa tagsa ka proyekto nga ginapatigayon sa syudad sang Iloilo.
Sa interview sang Bombo Radyo kay Estante, chairman sang Committee on Engineering, Construction, and Public Works, iya ginpahayag nga makapaayo kun himuon nga requirement sa mga kontraktor ang General Liability Insurance agud nga may makuha ang mga biktima sang aksidente tuga sang ginakay-o ukon ginatukod nga proyekto.
Suno kay Estante, magluwas sa insurance, required man ang mga kontraktor nga sundon ang ginamandu sang layi nga dapat may yara sang siganges ukon abiso nga makita sa tion nga may yara sang proyekto.
Ginpahayag ni Estante nga nalakip na sa kontrata nga katungdanan sang kontraktor ang pagpahamtang sang signages agud nga mapahibalo ang publiko.
Sa sini nga paagi suno sa konsehal, malikawan ang aksidente.
