ILOILO – Kinahanglan nga magpanindugan agud nga mapanubo ang kaso tubtub nga matapna ang pagpang-abuso sekswal ukon sexual harassment sa pungsod.
Sa Good Morning Philippines Program, ginpahayag ni Japhet Grace Moleta, Advocacy Coordinator sang Cameleon Association Inc., nga ang numero sang sexual harassment kasubong sang pagpanghimulos sa Western Visayas sang 2018 ang nagnubo sa 429 gikan sa 699 sang 2017.
Suno kay Moleta, subong nga 2019, indi pa matumod ang numero apang madamu pa ang unreported cases sa diin kalabanan sa mga biktima amo ang mga minor de edad.
Ginpahayag ni Moleta nga indi mahapos ang gina-agyan sang mga biktima sang pagpang-abuso sa pagkahangawa nga sila ang mabutang sa peligro sa tion nga magpanugid.
Para sa mga ginikanan ukon guardian, mahimo nga mahibalu-an kun ang isa ka minor de edad ang nangin biktima sang pagpang-abuso sekswal sa diin halimbawa sa mga palatandaan amo ang pag-angkon sang urinary tract infection, nabudlayan sa paglakat, pagbag-o sang paminatasan, masami nga pagpangasubo kag masami nga naga-isahanon.
Agud nga makabulig, kinahanglan suno sa natungdan nga pamati-an ang pahayag sang biktima, indi pag-isugid sa kay bisan-o ang tuhoy sa natabo sa baylo, magpangayo sang bulig sa mga social worker ukon trained volunteer nga may ihibalo sa Violence Against Women and Children.
