CAPAS, TARLAC – Target sang Ilongga athlete nga madugangan ang gold medal sang Pilipinas sa patag sang Javelin Throw sa nagapadayon nga South East Asian Games 2019.
Sa exclusive interview sang Bombo Radyo kay Evalyn Palabrica, tumandok sang Brgy. Guipis, Anilao, Iloilo, iya ginpahayag nga antes pa man siya nangin varsity player sang Far Eastern University, makapila na siya ka bes nga naghampang sa Palarong Pambansa.
Suno kay Palabrica, nagahampang siya sang volleyball kag basketball tubtub nga nahuyog siya sa Javelin throw kag nakahampang na sang makaduha ka bes sa South East Asian Games sang 2015 kag 2017.
Ginpahayag ni Palabrica nga bilang isa ka atleta sa patag sang Javelin throw, iya gid nga ginatutokan ang power-like training kag ang nanari-sari nga technique sa paghaboy sang Javelin.
Paghatag sang dungog sa Pilipinas, pamilya kag sa iya kaugalingon ang nagaserbe nga inspirasyon ni Palabrica para sa iya hampang sa Disyembre 8.
Sa subong, ginpahayag sang natungdan nga wala na siya sang may ginatutukan magluwas sa iya handum nga makuha ang gold medal.
