ILOILO CITY – Bukas 24/7 ang mga operation center sang Office of Civil Defense 6 may kaangtanan sa paglaslas sang Bagyo Tisoy.
Sa Good Morning Philippines program, ginpahayag ni Office of Civil Defense 6 Director Jose Roberto Nuñez nga buwas nga adlaw, pormal na nga ipaidalom sa blue alert ang bug-os nga Western Visayas bangud sa bagyo.
Suno kay Nuñez, mas maayo na nga nagapangaman agud nga wala sang pagbinasulay nga matabo sa ulihi ilabi na kun madamu ang ginbawi-an sang kabuhi bangud sa kalamidad.
Ginpahayag ni Nuñez nga posible nga ma-eksperyensyahan sa Northern Iloilo kag sa iban nga probinsya sa Western Visayas ang epekto sang bagyo bangud nga may yara ini sang malapad nga radius.
Sa subong suno sa natungdan, may yara na sang memorandum nga ginhatag sa tagsa ka Local Government Unit nga nagamandu sa paghanda sa tion nga mag landfall na ang bagyo.
May yara sang tatlo ka alert level nga ginapatuman ilabi na kun may kalamidad kag ini ang ginalakipan sang white alert nga amo ang pinakamanubo, ginasundan sang blue alert sa diin gina-activate ang emergency operation center kag red alert nga amo ang pinakamataas kun sa diin nakahanda ang tanan nga resources sang gobyerno.
