LEGANES, ILOILO – Nagdangat na sa tatlo ang patay kag isa ang kritikal sa natabo nga aksidente sa tunga sang wing van kag tricycle sa radial road sa Barangay San Vicente, Leganes, Iloilo.
Ang mga napatay amo sanday Victor Sina-on, 43 sang Brgy. Tigtig, Sta. Barbara, Iloilo nga amo ang driver sang tricycle, patay man ang mga sakay sini nga sanday Reynaldo Consurio, 49 anyos sang amo man nga barangay kag Armando Mondero, 50 anyos sang Brgy Barasan Este, Sta. Barbara, Iloilo.
Samtang kritikal naman si Julie Sison residente man sang Brgy Barasan Este, Sta. Barbara, Iloilo.
Samtang ang driver naman sang wing van amo si Grogonio Saban Jr., 42, sang Brgy Buwang Lambunao, Iloilo.
Sa interview sang Bombo Radyo kay Police Sr. Master Srgt. Willy Aquidado, imbestigador sang Leganes Municipal Police Station, iya ginpahayag nga sa intersection nakabunggo ang tricycle sa wing van sa diin halin sa Sta. Barbara ang tricycle kag padulong sa direksyon sang Leganes samtang ang wing van naman ang halin sa Zarraga kag padulong sa Jaro.
Suno kay Aquidado, nakabunggo sa kilid sang wing van ang tricycle sa diin sa paglantaw sang imbestigador, wala na makapreno pa ang driver kag mabaskog ang impact sini sang pagkabunggo.
Sa pagkamatuod pahayag sang imbestigador, nagluto ang apat ka mga biktima sa isa ka balay sa Sta. Barbara bangud nga pista subong sa nasambit nga banwa.
Ginhawidan pa kuntani sang tagbalay ang mga biktima nga indi na lang magpauli apang wala napunggan ang mga ini.
Dugang pa sang natungdan, nakadepende na sa pamilya sang mga biktima kun bala mapasaka sila sang kaso batuk sa driver sang wing van.
Samtang aminado naman ang driver sang wing van nga si Saban nga wala niya nakit-an ang motorsiklo bangud yara ini sa natuo nga bahin sang direksyon.
Nakibot na lamang si Saban nga gilayon may naglagpok kag sang iya nakita nga nakabunggo ang tricycle sa wing van nga iya ginamaneho, gilayon siya nagpanaog kag ginlantaw ang natabo.
Sa subong nagapabilin sa Leganes Municipal Police Station ang driver sang wing van.
