ILOILO CITY – May yara para sang legal remedy ang Panay Electric Company batok sa MORE Electric and Power Corporation may kaangtanan sa pag-agaway sang duha ka kompaniya nga mangin power distributor sa syudad sang Iloilo.
Ini matapos nga gin-grant sang Supreme Court en banc ang hingyo sang MORE Power nga Temporary Restraining Order batok sa desisyon nga ginpaguwa sang Mandaluyong RTC nga napetsahan sang Hulyo 1 nga ipauntat ang hearing sang writ of possession.
Sa interview sang Bombo Radyo kay Atty. Leo Superio sang Integrated Bar of the Philippines, iya ginpahayag nga indi pa tapos ang away sa tunga sang duha ka electric company.
Suno kay Atty. Superio, ang kaso ang gintugyan na sang Supreme Court en banc sa isa ka division kag mahimo pa nga makapasa sang motion for reconsideration ang Panay Electric Company.
Ginpahayag ni Atty. Superio nga ang Supreme Court en banc ang ginabug-usan sang 15 ka hukom kag mahimo sila nga matunga sa pila ka division nga ginabug-usan lamang sang 3 ka hukom.
Mabug-at ang desisyon sang en banc ipaanggid sa isa lang ka division apang kun makapasa sang mabaskog nga argumento kag pamatuod ang Panay Electric Company, mahimo pa nga mabaliskad ang desisyon sang Supreme Court en banc.
