ILOILO CITY – Nabaton na ni Iloilo City Mayor Jerry Treñas ang resulta sang imbestigasyon sang Energy Regulatory Commssion tuhoy sa nagakatabo nga pole fires sa syudad sang Iloilo.
Sa interview sang Bombo Radyo kay Mayor Treñas, iya ginpahayag nga ang iya nga pagsulat ang naghatag sang ideya sa Energy Regulatory Commssion tuhoy sa masami nga nagakatabo nga sunog tuga sang linya sang kuryente nga iya sang Panay Electric Company.
Suno kay Mayor Treñas, wala siya nagapamersonal sa pamilya Cacho kag sa pagkamatuod, abyan niya ang tag-iya sang Panay Electric Company.
Ginpahayag ni Mayor Treñas nga bilang isa ka public utility, kinahanglan nga mahangpan sang pamilya Cacho nga dapat maayo ang serbisyo nga ginahatag sa pumuluyo.
Sa findings sang Energy Regulatory Commission, ginapasabat ang nasambit nga electric company kun nga-a indi sila dapat nga pagpasakaan sang kaso bangud sa masami nga pole fires.
